كون كانت الصفيحة ترد العار كون رداتو على الحمار، موعظة لمن يتعظ الناس كاع يتعلموا من اخطاء الماضي و من تجارب لي سبقوهم إلا واحد رباعة عندنا، عندهم واحد الإصرار عجيب على الكذوب وتلفيق التهم و العناد كيقولو لمسيلمة الكذاب نوض تكعد غنجلسوا بلاصتك راه هربنا عليك بسنين ضوئية.
و كيفما هو حال بزاف الناس 2023 مادخلاش زوينه عندنا كاملين كل واحد و كيفاش إستقبلها، وبطبيعة الحال رباعة أشباه المعارضين دخلات عليهم بسقوط حر بدون مظلة نحو الهاوية مباشرة تاسمعنا رااااااق، ناس جاهم الصهد فعز لبرد كلشي تفضح و بان، و حتى دوك جوج بوستات لي شبعانين دراما كوين ديال المعطي منجيب باش يزهي بيهم التفاعل عندوا مابقاو واكلين والو مغاربة عاقوا بيه، وحتى خيبراتورة العناوين الكاذبة المونيكا الفيلالي تسالاو ليها مابقاو ليها والو وتنعي راسها لمثواها الأخير فلوس الأدسنس و مادير، هذا بلامنساو حويجيبة و سلوكيات مادام الريسوني، وفؤاد عبد المومني و إستفزازاتو ماعرفتش واش هاد سمية المومني تابعها شي سخط و لا كيفاش.
أودي عييتوا ما طيرو او تنزلوا فالتالي خسرتوا كاع ليماتش ديالكم السياسية و الحقوقية و الإعلامية و حتى القضائية،صدعتونا بالدلائل و شي دليل ماشفنا، زعما مفكمش شي رجل رشيد ينهاكم عما أنتم فيه من ضلال عاالله و عسى تحفظوا شي شوية الكرامه هادشي الا بقات عندكم أصلا.
العجيب و لي من مدة و أنا كنحاول انستوعبو فهاد الكليكا، هو أن هاد الناس هلكوا لينا الأسماع ديالنا بحقوق الإنسان و المنافحة الخاوية على المظلومين و ديك البلابلا، و فنفس الوقت كيناصروا الظالمين على حساب المظلومين اللوجيك في خبار كان معاهم، دبا غير بالعقل قولي كيفاش عاطيك خاطرك دافع على سادية بوعشرين،انت كيفاش غادافع على واحد هتك عرض بالعنف وبالدلائل و تجيوا تقولوا مؤامرة واش كتعيشوا فشي عالم موازي و لا شنو؟
داخت ليكم الحلوفة أ معلم و مابقيتوا عارفين شمن طريق تشدو، و صراحة هادشي كان باين غير ملي قررتوا تنصبوا محمد زيان رمز حقوقي، أصلا هادي بوحدها كتخلينا نشفقوا عليكم و على حالكم لي يشفي العدو، هترتو و خرفتو و الهترة ديالكم ماعندهاش حدود و فكل مرة كتديرو شي خطوة باش تشوهو السمعة ديال المغرب وتلفقوا شي منتيف للمخزن، كطيحوا فشر أعمالكم و كتولي فرصة لينا باش توضاح عندنا حقيقتكم، وعلى ذكر المخزن واش هو مسالي ليكم ماعندوا والو زعما؟ علاش لي متفكوش حريرتكم مع الضحايا ديالكم وناس لي متابعينكم بكل روح رياضية و بمبدأ درت علاش نتعاقب و تهنيوا الوقت ولا المخزن هو ديك الشماعة لي كتعلقو عليها فضايحكم.
و بما ان شر البلية مايضحك، وحب أشباه المعارضة للأضواء و البوز الخاوي مكايساليش ناضو كيضغطوا على الشيخة وهيبة باش دخل على الخط وترجع لأيام كيسان الراح و الليالي الملاح ومؤازرة االشوكر دادي اللاحلاح، إنطلاقا من التهجم على الشعب المغربي و سبه قدام البيت الأبيض كعربون محبة و عودة الى ساحة الجمهوريين بعد إعتزال لأكثر من سنة على أساس وهيبة مطفراه هادي راه فحد ذاتها كتعلن السقوط ديالكم الشباب، واش السيدة غارقة حتى لودنيها “هاربة” من المغرب للولايات المتحدة بطرق مشبوهة و معولين عليها كون كان الخوخ يداوي كون داوا راسو كاعما تحتاج تمسح المؤخرات المكمشين وتدل راسها باش تهرب.
الحصول تشوف تا تعيا مع هاد القوم، وتقول لا حول ولا قوة الا بالله و من هاد المنبر بغيت نقولهم راجعوا أنفسكم قبل مايفوت الحال، و الندم ديالكم مايبقا نافع لوالو، و إستفاذوا من أخطاء لي سابقينكم وإحترموا بلادكم و قانونها و باراكا ما تكونو كراكيز كتحركها دول معادية لهذه الأرض المباركة و السلام عليكم.