الرئيسية آجي تستافد.. ! دخل تستافد.. الناس لي مازال ماعارفينش شنو هي anapec و شنو هي Contrat anapec ؟

دخل تستافد.. الناس لي مازال ماعارفينش شنو هي anapec و شنو هي Contrat anapec ؟

كتبه كتب في 17 فبراير 2020 - 9:46 م
مشاركة
عقد أنابيك Contrat Anapec :
كتقلب على خدمة ولا جاك عرض عمل بعقد أنابيك و معرفتي مادير!! و خايف ماتسنيش؟ وخايف واش تقبل ولا ترفض و تندم من بعد؟
الحل ساهل أخويا ولا ختي، تبع معايا هادشي لي جاي مزيان و ركز معايا لاحقاش القانون لا يحمي المغفلين. عرف حقك و عرف واجباتك و ماتخافش. 🙂

أولا :

غانشرح ليكم شكون هيا هاد أنابيك (الوكالة الوطنية لإنعاش الشغل و الكفاءات): هي مؤسسة عمومية عندها الإستقلالية المالية و المعنوية، وهي تحت الوصاية ديال وزارة الشغل، و جميع الخدمات ديالها مجانية و كنسطر عليها مزيااااان “جميع الخدمات ديالها فااابور” و تبع معايا مزيان، النشاط ديالها كيتفرق على 3 محاور كبرى:
  1. الوساطة فسوق الشغل بين المشغلين و الباحثين عن العمل لي هو نتا، و هادا سميتو برنامج إدماج contrat insertion ou contrat ANAPEC سميوه لي بغيتو، دبا علاش هاد البرنامج دار هاد الكونترا أنابيك، علاش ماتكونش كونترا عادية (CDD/CDI) ؟
    حيت هاد الكونترا ماكيزعموش عليهم الشركات و ماكيبغيوش إخدمو الشباب لي ماعندهمش خبرة بهاد النوع ديال الكونطرات، حيث ببساطة فيها مجموعة من الإلتزامات و التكاليف للمشغل و كيدير بناقص وكيجيب سطاجير إحرث بيه.
    و باش الدولة توضع حد لهادشي خرجو مفهوم جديد سميتو عقد إدماج لي هو عبارة عن سطاج مع وعد بالعمل و لكن ماشي بالضرورة ملي تسالي تخدم! غي بلاتي متزربش و تبع معايا مزيان، هاد عقد أنابيك فيه مجموعة من المميزات للمشغل و للباحث عن العمل، بالنسبة للمشغل مكيخلصش الإقتطاعات ديال CNSS، بالنسبة للباحث عن العمل مكيخلصش الضريبة على الدخل IR و كيستافد من التغطية الصحية الإجبارية AMO. غاتقوليا علاش مايستافدش من CNSS أو التقاعد؟
    مزيان، رجع لشنو قلت فاللول، نتا لحد الآن غي سطاجيير خاصك تكون واعي بهادشي و المشغل قلنا مكيخلصش عليك CNSS و نتا كذلك إذن كيفاش بغيي تستافد منها و نتا مخلصتيهاش و أصلا الصندوق حريرتو حريرا و غير خليو داك الجمل راكد:)
    المهم، ملي غاتمشي تسني كونترا خاصك بطبيعة الحال تقراها مزيان و الحاجة لي مفهمتيهاش سول عليها، من حقك و مافيهاش عيب و خصك تعرف بلي ممكن تستاقل و ممكن إجري عليك المشغل فأي وقت، و هادشي خاص إقولها ليك فلول نهار السينياتور، عندك الحق تستافد من كونترا أنابيك الا مافاتش 6 شهور.

    نعطيك مثال، إلا خدمتي بعقد أنابيك و دازت شهر أو شهرين أو حتى خمس أشهر و خرجتي أو خرجوك فعندك الحق تستافد من عقد أنابيك أخور إلا جاب الله لقيتي خدمة بكونترا أنابيك. أما إلا فتي 6 شهور د الخدمة و خرجتي فمعمرك باقي غاتستافد من كونطرا أنابيك حيت لسبب بسيط الدولة غاتعطيك زوج فرص باش تستافد من عقد أنابيك لي فيهم المميزات لي قلنا فلول و مغاتبقاش ديما تخلص عليك الضريبة و على المشغل الإقتطاعات ونتا تبقا تبدل من خدمة لخدمة و ديما بعقد أنابيك و هادشي فيه ردع للمشغلين باش مايبقاوش إدخلو و يخرجو الناس و يستغلو المميزات د العقد (قلنا متيخلصش الضمان الاجتماعي و الضريية على التكوين المهني) و خاصك تعرف أن المشغل حتى هو إلا مالتزامش إخدم 60% من ناس لي دار ليهم كونطرا أنابيك فراه معمرو غايستافد مرة اخرى من هاد المميزات. مثلا إلا شي شركة خدمات 10 أشخاص بسطاج / كنطرا أنابيك فكيلزمها تخدم بعقد (CDD/CDI) على الأقل 6، إذن، تايبقى الحل هو تفرض راسك تكون مابين دوك 6 و تبين على حنت يديك.
    و خاصك تعرف كذلك أن عقد انابيك أقل حاجة فيه هو 1600 درهم و أكثر حاجة هو 6000 درهم و أقصى مدة هو 24 شهر أي عامين كتسالي كونطرا تلقائيا، إما كتفارقو إما كيحولها لكونطرا عادية حلالا طيبا 🙂
    و نتا سطاجير خاصك تفرض راسك باش تترسم معاهوم إن شاء الله. و دبا مني عرفتي هادشي كامل و عرفتي لي عليك و لي من حقك فأنت غاتعرف واش تسيني كونطرا أنابيك ولا لا و إلا باغي الرأي ديالي غي سني أحنيني ولا أحنينتي و توكل على الله وإن شاء الله يكون خير.. مدبرها حكيم 🙂

  2. التكوين وإعداد يد عاملة كفأة كتناسب لمتطلبات سوق الشغل (كدير دورات تكوينية على حساب دراسة كديرها كتبين ليها كل جهة فالمغرب أشمن نوع د الخدمة لي مطلوب فيها، أولا الشركات فديك البلاصة أشمن خصاص عندهم و عليها كيلونصيو دورات تكوينية باش الشباب إتكونو و يكون عندهم دبلوم فداك التخصص و يقدر يخدم هادشي فابور، ولكن ماشي غايخدموك من بعد الدورة التكوينية.. لا فيق معايا هما كيتنبأو فقط.
    نعطيك مثال (فجهة الدار البيضاء مثلا، الدراسة عطات ليهم بلي كاين خصاص فعمال مجال الفندقة، ولنصاو دورة تكوينية للشباب لي بغاو هاد المجال على أساس إكون عندو دبلوم و ملي تجي شي شركة كتقلب على هادشي كيعيطو ليك، هادي سميتها  formation qualifiante de reconversion.
  3. توجيه و مرافقة حاملين المشاريع أو auto-emploi، عندك مشروع باغي تبداه معارفش حتى لعبة على كيفاش تأسس شركة أو أشمن نوع د الشركات أو الأوراق لي خاصك، المهم كلشي كتمشي لأي agence أنابيك قريبة ليك كتاخد معاهم موعد و كتكمل معاهم و فيها بزاف د الحوايج اعاونوك فيها و يوجهوك حتى باش تلقى التمويل عند جهات مختصة كـ المبادرة الوطنية للتنمية البشرية إلى غير ذلك.
    و شخصيا كنصحكوم تتاجهو لهاد الإتجاه، دير مشروع ديالك وخا يكون بسيط و هما غادي إعاونوك.
مهم، هادشي بخلاصة خفَن زربن، أهم الأدوار ديال أناييك، نتمنى تكونو ستافدتو و سولو على هادشي لي قلت ليكم و تأكدو منو راه أي agence anapec مشيتي ليها سولهم غايشرحو ليك كولشي تحركو ترزقو و ماتنساوش تبارطجيو تنفعو غيركم الله يرحم الواليدين. 🙂 🙂

مشاركة

تعليقات الزوار ( 0 )

اترك تعليقاً