شنو هو العقد ف القانون المغربي !

العقد أو الكونطرا… وثيقة كانسينيو عليها و بعد المرات بلاما نقراو أشنو فيها (إلا من رحم ربي) بحال ف البنكة و التأمين .. بنادم جاي فرحان كاتعطيه السيدة بزاف ديال الوراق كايبدا يتخيل راسو رئيس مدير عام ديال شركة متعددة الجنسيات…
خاصنا نعرفو أشنو هو العقد !
التعريف اللغوي كايقول أن العقد هو نقيض الحل، يقال عقدت الحبل، فمعنى العقد، الشد والربط ويطلق العقد على العهد كما يطلق على الميثاق قال ابن العربي:”وسميت وثائق من الوثيقة، وهي ربط الشيء لئلا ينفلت ويذهب، وسميت عقودا لأنها ربطت كتبة، كما ربطت قولا”.
أما اصطلاحا فيقصد به عند الفقهاء والموثقين تحرير الوثائق بطريقة معينة من أجل الاعتماد عليها فيما بعد.
الفصل الثاني من ظهير الالتزامات والعقود لي هو القانون المدني المغربي كايتكلم على شروط صحة العقد و كايحددها ف 4 شروط.
الأهلية : و عي أن الانسان يكون عندو الحق قانونيا أنه يبرم عقد، غالبا هي 18 سنة ولكن كاين حالات تتجاوز فيها هاد 18 سنة.
الارادة : وكيقصد بيها الإرادة المتبادلة بين جميع أطراف العقد و يمكن التعبير عنها بكل الوسائل المتاحة لإيصال الرسالة.
يجب أن يكون الشيء موضوع العقد حقيقي و يصلح باش يكون محل التزام، يعني ما تكونش بقعة أرضية ف كوكب زحل.
سبب العقد : يكون مشروع يعني ما كايتنافاش مع القانون مثلا ما عنديش الحق ندير معاك كاتلتزم فيه أنك غادي تقتل واحد السيد ما كانحملوش و نخلصك.

العقد كايقدر يكون كتابي ولا شفوي و عندو آثار لي كاتنتج على تطبيقو وايضا عدم الاحترام ديالو.