بغيتي تاخد شهادة العمل، عارف كيفاش؟

شهادة العمل هي وثيقة تثبت أنك  كتمارس واحد النشاط مهني معين ف واحد الشركة معينة لي كاتدلي بها في عدة مساطر، كريدي، تأشيرة، بطاقة التعريف الوطنية أو جواز السفر… و لي من حق أي أجير يطلبها و من واجب أي باطرون يعطيها.

كاينة الحالة لي كاتخدها عادي، أنت خدام خدمتك، و الباطرون عارف واجباتو و القضية عادية، كادير طلب حسب المسطرة الداخلية لكل شركة و تسلم لك فيها الطابع و الإمضاء ديال المسؤول و لي غالبا كايكون المسير ف الشركات الصغرى و المدير العام ولا مدير الموارد البشرية ف الشركات الكبرى.

حالة الرفض فيها عدة حالات :

كاين ويلا نتا مازال خدام و ما بغاش يعطيك الباطرون الشهادة، ف هاد الحالة كاتراسلو بشكل حبي، إلى رفض كاتراسلو عن طريق مفوض قضائي باش يبقا عندك الدليل و الحجة، من بعدها كتمشي عند مفتش الشغل… إلى رفض غيكون الحل هو أنك تلجأ للقضاء الإستعجالي بمحكمة الشؤون الاجتماعية الذي يأمر صاحب الشركة بتسليمك للشهادة إستنادا لطلبك.

الحالة الأخرى هي أنه رفض و أنت إما طاردك هو إما أنت مستاقل، ف هاد الحالة كادير طلب إلى رئيس المحكمة ديال الشؤون الإجتماعية لي كايصدر الأمر ديالو للباطرون باش يعطك حقك.

إلا كنتي مازال خدام من الأحسن حاول تحل المشكل حبيا.. ويلا باقي شومور الله يجيبلك شي خدمة، قول آمييين 🙂