حوار ساخر لمحمد زيان، معلقا على قضية لمجرد: “المحامي ديال لمجرد مافيدوش”

Vous les femmes
Vous le charmes
Vos sourires
Nous attirent nous desarment

ياسلام زيان كيسمع و كيستمتع بذكريات الزمن الجميل ذكريات فيكتور مارتين. شوية زيان صونا عليه التلفون.صوت نسوي فرنسي جميل على الخط.

فيكتوريا : monsieur زيان bonjour. أنا المحامية فيكتوريا نيكول.إلا عقلتي أنا كنت محامية متدربة كنت كانجي للمغرب نحضر للمحاكمة ديال نوبير الأموي باش نتعلم ونشوف كيفاش كونتي كتغبر شقف للسياسيين والنقابيين.

زيان: مرحبا سيدتي. أنا نقدر نسى كولشي إلا لعيالات. عقلت عليك.مرحبا شنو المطلوب؟

فيكتوريا: أنا دابا هي المحامية الجديدة ديال سعد لمجرد فمرحلة الاستئناف. المحامي السابق ديالو moretti هو لي قالي نتاصل بك ونستاشر معاك حيت عندك خبرة ف القضايا الجنسية.

زيان : هداك Moretti ما فيدوش وخا ولى وزير العدل عندكم ففرنسا. أنا سابقو فالحرفة وحسن منو حيت أنا وزير سابق فحقوق الإنسان و زير نساء سابق وعندي الخبرة فقضايا الجنس والنساء.

فيكتوريا : سي زيان كيفاش يمكن ليا نرد على المحكمة لي جابت الأدلة صوت وصورة من الاوطيل لي بات فيه سعد مع Laura؟

زيان : المحامي ديال سعد مافيدوش. وخا المحكمة جابت التصاور و الفيديوات من الغرفة ديال الأوطيل كان على سعد ينكر ويطلع ل جبل. يقول داكشي راه غير مفبرك و يطلب الخبرة ديال واحد المختبر فمريكان كنعرفو غير أنا و وهيبة.

فيكتوريا : ok. واش ماكانش ممكن نلقاو شي اتفاق مع laura بلا هاد الصداع كلو؟

زيان :طبعا. المحامي ديال لمجرد مافيدوش.كون عندو خبرة وتجربة بحالي كون هز laura ف الكوفر ديال طوموبيلتو و هرب بها حتى لدارو و تما تبقى عندو حتى يساومها بلفلوس و يقنعها.

فيكتوريا : ماكاتشوفش أن سعد كان يستاهل حكم مخفف حيت على الأقل احتارم القضاء و بقى كيمشي لفرنسا يتحاكم بوجهو حمر.

زيان: المحامي ديال سعد مافيدوش. كان خاصو يقول لسعد يبقى فالمغرب ويخلي حتى يدوز شوية ديال الوقت و يهربو من مليلية و يسيفطو ل مريكان كون دابا عايش مرتاح. أو على الأقل كان يسيفطو لتونس و من تما ل مريكان.

فيكتوريا: تونس؟ علاش تونس؟

زيان : غادي نعطيك أرقام ديال 2 د الناس ديالنا فتونس تاصلي بيهوم وهما غادي يفيدوك. إلا ماشديتيش عماد تشدي عفاف و حسن ليك تشدي عفاف توريك كيفاش قضات الغرض.

فيكتوريا : ولكن حتى فأمريكا سعد عندو مشاكل ويقدر يتشد.

زيان: المحامي ديال سعد ما فيدوش. إلى وقع شي مشكل فمريكان كاينة الحدود مع المكسيك من تما يخرجو ل باناما ويعيش هاني مع راسو. المحامي لي ماكيعرفش القوالب وتحرميات ديال الحدود ماشي محامي.

فيكتوريا: سي زيان هاديك الآثار ديال العنف لي فالكتف ديال Laura كيفاش ندير ليها؟

زيان : المحامي ديال سعد مافيدوش.كان يقول هادوك les traces لي فالكتف ديال لورا ماشي ديال العنف غير ديال السواك. واش أعباد الله حاجب كيفهم احسن من محامي ووزير عدل خرايف جحا هادي.

فيكتوريا: سي زيان شكرا بزاف على هاد المعلومات بغيت العنوان ديال المكتب ديالك ربما نجي عندك.

زيان: مرحبا سيدتي. عنوان المكتب résidence laarjat- rdc- appart 1.

الموقع الإلكتروني:
Www.or.tata.com.

(ملاحظة: هذا الحوار، هو حوار افتراضي ساخر لمحمد زيان)