بيع العقار في طور الإنجاز أو ما يسمى بالدارجة “كنشري على البلان” هو عملية قانونية داروها باش من خلالها المنعش العقاري يقدر يبدا الخدمة و ياخد ف نفس الوقت التسبيق من عند المشتري باش يمول المشروع ديالو و نفس الوقت المشتري كايستافد من أنه كايقدر يشري الدار بشوية بشوية حتى توجد.
كان واحد القانون لي كاينضم هاد المعاملة و هو القانون 44/00 ولكن كان فيه بزاف ديال الاشكالات كجميع القوانين لي كاتكون دارت أول مرة، هذا القانون تم التعويض ديالو بالقانون 107/12 و لي من خلالو تعطات ضمانات أكثر للمشتري نظرا لأن القانون الأول ما كانش كايمنح ضمانات.
القانون 107/12 كايحتم على المشتري أنه يخلص بالطريقة التالية :
- 5% عند إمضاء العقد.
- 75% مقسومة على 4 ديال الدفعات على شكل المراحل التالية :
- ملي كايتبنى الساس ديال العمارة أو كيف ما كايتسماو فالحرفة ديال البني les fondations.
- ملي كايكملو الأشغال الكبرى ديال العمارة gros oeuvre.
- ملي كايكمل الفينيسيو و كاياخد المنعش العقاري رخصة السكن permis d’habitat.
- ملي كايعطيك الساروت خاص تكون بقات بيناتكم 20%.
المهم أي عقد ما فيهش هاد الشروط بالاضافة لأنه يكون محرر من طرف محامي معتمد أو موثق و مصادق عليه راه لا يعتبر عقد لبيع عقار في طور الانجاز.
تعليقات الزوار ( 0 )